Die
Kroasiese duo 2Cellos, bekend vir hul uitvoerings van pop- en klassieke musiek,
lyk of hulle mekaar uitdaag in die eietydse Violoncelles Vibrez van die
Italiaanse komponis Giovanni Solimma. Iets
soortgelyks kan in die Odeion Sinfonia se konsert die naweek in Bloemfontein
verwag word.
Die
plaaslike tjelliste Chris van Zyl en Ashlin Grobbelaar is die soliste in
dieselfde werk, met die tjellis Anmari van der Westhuizen op die podium. Van
der Westhuizen is ook Van Zyl en Grobbelaar se dosent aan die Odeion Skool vir
Musiek (OSM), dus kan ’n gefokusde uitvoering verwag word.
Die
Sinfonia, ’n studentestrykorkes van die OSM, open sy program met Cantus in
Memory of Benjamin Britten, wat waarskynlik die Estlandse komponis Arvo Pärt se
gewildste werk is. Pärt het dit as ’n elegie ná Britten se dood in 1976
geskryf, ter ere van dié Britse komponis wat volgens hom die suiwerheid
openbaar het waarna hy (Pärt) streef. Die werk is in die vorm van ’n kanon.
Carl
Nielsen, ’n 19de eeuse Deense komponis, het sy Little Suite for String
Orchestra, op. 11 op 22-jarige ouderdom gekomponeer toe hy nog ’n student was.
Die werk is die eerste keer deur die Tivoli-orkes in Kopenhagen uitgevoer met
Nielsen een van die orkeslede.
So
gewild was die musiek dat die gehoor Nielsen verskeie kere na die verhoog
teruggeroep het.
Serenade
for strings op. 11, ’n werk in vier dele deur die 20ste eeuse Sweedse komponis
Dag Wirén, sluit die program af. Wirén is nie buite Swede bekend nie, behalwe
vir dié serenade wat deel van internasionale strykorkeste se repertorium is.
Die
konsert is 23 September om 19:30 in die Odeionteater, UVkampus. Toegang is
gratis.
 |
| Ashlin Grobbelaar |
 |
| Chris van Zyl |
Comments
Post a Comment